Beware of Pity

نورتي الدنيا

g3foor — Sat, 25 Dec 2010 19:20:06 +0000

نور عين قلب بابا رودينا
نورتي الدنيا كلها ، اخيراً شفتك بعيني مش مجرد صورة على شاشة أو مطبوعة ، النهاردة هزتيني و وزلزلتي جبل ، خلتيني أول ما شفتك محدش بقى فاهم باعيط ليه وأنا اللي عمر عيني ما دمعت.
نورتي حياتي يا نور القلب.

كل حاجة بتتحرق

g3foor — Wed, 10 Nov 2010 17:55:39 +0000

حاجة غريبة جداً ، كل يوم بقرأ خبر حريق في المترو ، حريق في قطار ، حريق في مدرسة ، ومن فترة كان حريق في محطة إسالة غاز.
هما مهندسين مصر حصلهم ايه؟ من ساعة ما سافرت وكل اصحابي المهندسين في تخصصي وهما بيتسرسبوا بره البلد ، مبقتش عارف امال مين اللي فاضل ، امال مين بيصمم أنظمة مكافحة الحريق في مصر دلوقتي لما كل دول بره مصر؟
بيشلني أكتر لما اتابع تفاصيل الخبر ، حاجات ا ، ب ، الهندسة وما بتتعملش ، طيب ومستنين ايه غير إن المبنى ولا المترو يتحرق!
حاجة تفقععععععععععععععععععععععععععععععععععععععععععععععع

أمي الحبيبة

g3foor — Wed, 10 Nov 2010 17:49:03 +0000

أمي الحبيبة:
الله يرحمك يا أمي ويحسن مثواك زي ما ربتيني وعلمتيني ، كان نفسي تبقي موجودة معايا و تتفرجي على إبنك عمل ايه في شغله ، صدقيني أنت أول سبب خلاني مصر إني لازم انجح واتفوق في مجالي ، كل ما باعدي على مطار الدوحة اقولك فينك يا أمي تيجي تتفرجي على شغل إبنك الصغير وتتفاخري بيه زي ما كنت بتفرحي بنجاحي ، لسه دموعك يوم مناقشة مشروعي ما نشفتش على ايدي ، بس عارف إن ربنا اختارلك الأفضل وارتحتي ، وكإن ربنا يرفض إنه يرحمك بدون أن يرحمني معك ، فوفقني في زواجي وكإن زوجتي إنت اللي ربتيها ، باسمعك في كلامها ، باشوفك في بصتها ، باسمع حنية صوتك عليا وأنا مريض أو راجع تعبان في صوتها ، حتى نفس الكلام بتقوله ، تخيلي برده بتقولي يا نور عيني وكإنك إنت اللي غششتيها ، الله يرحمك يا أمي مش ناسيكي أبداً والله وفي كل خطوة باخطيها بادعيلك ربنا يرحمك ومش مصبرني على فراقك إلا إني متأكد إنه مجرد وقت قصير وربنا حايجمعني بيكي تاني.
ربنا يكرمك ويرزقك أعلى منازل ودرجات الجنة زي ما تعبتي معايا وربتيني ويكرمك عني وعن إخواتي وعن كل كلمة جميلة وكل مبدأ زرعتيه فيا وما تخلتش عنه لحد دلوقتي.
إبنك اللي ساكنه في ضميره

جننتيني

g3foor — Wed, 10 Nov 2010 17:38:01 +0000

إبنتي الحبيبة:
كل يوم بتخانق مع ماما بسببك ، انا باشتري لعبك وحاجتك كلها بناتي وهي بتشتري لعب اولادي وكل ما نروح للدكتورة تبقى حاتنتحر مننا ، أول ما تبدأ الكشف احنا الإثنين نقول في نفس واحد ما تقوليش نوع المولود ، لما الدكتورة قربت تنتحر مننا من الخضة ، لخبطتي حياتي يا بنت الأيه ، بعد ما كنت باروح ادور على كتب في مكتبة جرير بقيت اروح ابص على قصص مصورة ، واشتريلك هدوم ، أول ما تيجي بالسلامة حتلاقي مخزن اسطوووووووووري من الهدوم واللعب ، واشترتلك القصص اللي حسليكي بيها قبل ما تنامي ، جننتيني يا بنت الأيه حياتي واقفة عندك ومش راضية تتحرك ، ما بقتش افكر في شغل ولا اني انقل مكان تاني ، بطلت اقرأ في كتب الهيدروليك وبقرأ عن تربية الأطفال وصحتهم ، لما توصلي بالسلامة حتلاقيني عارف عنك كل حاجة أكثر من اللي ربى مليون طفل ، حتى أغانيكي باحفظهالك من دلوقتي ، غيرتيني بعد ما كنت باسمع لنفسي قصائد نزار بقيت اسمع أغاني أطفال ، عملتي فيا ايه مش عارف ، والاقي ناس مش فاهمه حاجة تقول الأب بيرتبط بأولاده بعد أشهر من الولاده ، دي ناس ما تستاهلش نعمة الأبوة ولا عمرهم حسوا بيها ، مش فاضل غير إنك تحني عليا وتيجي لبابا.
المجنون بحبك
بابا

وحشتيني

g3foor — Wed, 10 Nov 2010 17:25:19 +0000

إبنتي الحبيبة:
وحشتيني جداااااااااااااااااااااا ، النهاردة كإن حاجة بتناديني و بتلح عليا إني اقعد اتكلم معاكي لما قربت اتجنن ، كل يوم وانا رايح الشغل اركب العربية و ابص في مراية الصالون عليكي مبلاقيكيش قاعدة في مكانك المفترض وبافضل طول الطريق ابص عليكي علشان اتطمن عليكي ، باخرج من العربية بابص على كرسيكي ، وباقفل الباب بالراحة علشان ما تتخضيش ، باطلع الشغل وبحاول الوقت يعدي عليا بأسرع وقت علشان ارجعلك ، باطلع السلم ومستنيكي تقفي على اول السلم وتشاوريلي وتضحكي ، أنا مش مجنون ، عاقل جداً بس حاسس إن ربنا زرع جوايا حاجة توصلني بيكي من قبل ما اشوفك ، مامتك ممكن تكون هي اللي مجنونة كل يوم باشوفها بتكلم ابنها ومصره إنه ولد وأنا مراهن الكوكب كله إنها بنت مش ولد ، لإني عارف إن ربنا مش حايخيب ظني أبداً وانا اللي سألته في بيته إنه يرزقني بيكي ، وإن شاء الله تيجي وتنوري دنيتنا اللي قادت تاني بيكي.
من المجنون بيكي
بابا

الشباب العانس

g3foor — Sat, 29 Aug 2009 18:37:01 +0000

الشباب العانس

ايوه العنوان صحيح 100% مفيهوش أي غلط ، الشباب هو اللي عانس مش البنات ، شفت بنات كتير خلال مدة الدراسة والعمل في مصر واستغربت جداً البنات دي مش متجوزة ليه؟

والاقي حد من اصحابي يقولي ما تعرفش عروسة؟ ياعم كل دي بنات موجودة وأنت مش شايفها؟ ده أكيد مش شايفها لأنك أعمى.

بتلاقي البنت بغض النظر جميلة شكلاً أو لا لإن الموضوع ده أذواق لكن جميلة خلقاً ومثقفة وإن كانت عاملة فهي متفوقة في عملها وغالباً نشيطة إجتماعياً في أعمال خيرية ومتدينة جداً تحافظ على النوافل كالفروض.

ولا تطلب زوج غني ولا أثاث من سويسرا ولا دمياط حتى ، ولا ضرورة للغسالة الكهربائية ولا السجاد ولا مانع من السكن مع أهل الزوج او شقة إيجار جديد في مايو.

لا ضرورة للفرح ولا داعي لشبكة فدبلة و خاتم تكفي. هي تبحث عن الكفاح في سن يسمح بالكفاح.

بالله عليكم من العانس؟

هو الشاب الذي يضع مئات العراقيل أمامه في الزيجة يضع أمامه عراقيل تعيقه عن التمتع بالدنيا مع زوجة صالحة تعينه وتكون خير متاعه في الدنيا.

بكل أسف الدنيا ، أصدقائي الشباب أنتم شباب عاااااااااااااااااااااااانس مثل سيارة بدون موتور وغير مأسوف على حالكم اللي اخترتموه بإرادتكم الحرة.

وفي نهاية المطاف ستتزوج بدون جميع الكماليات التي تبحث عنها لكن ستتزوج بعد أن تخسر أجمل سنين عمرك وتخسر مشاركتك زوجتك في رحلة كفاحكما معاً و ستندم على كل لحظة قضيتها بدون زوجتك.

لكن البنت هي في بيت أهلها معززة مكرمة تزداد خلقاً و ثقافة وتهذب من روحها بكل الأنشطة المشاركة فيها وحتلاقي البنت وقتها بين دروس دينية و أنشطة إجتماعية أو ثقافية في الأوبرا أو ساقية الصاوي أو في مكتبة هي تزداد علماً

و حضرتك بتزداد جهلاً بقعدتك على القهوة مع أصحابك تشد في الشيشة مرة كانتلوب ومرة فراولة ولما تفقر معاك تنقل لمعسل السلوم.

يوم ما بتتناقش تتناقش في تشكيل حسن شحاته ومين مضى مع الأهلي و نكبة الزمالك الجديدة ، ويوم الثقافة العالمي بيبقى مع ماتش ريال مدريد و مانشستر.

وافضل دور على بنات ع الماسنجر و الفيس بوك ، دور على أفلام على النت تشوف ايه اللقطات ال uncut في الفيلم.

مش شايف البنت خسرت أي حاجة ولا خدت ذنب واحد في وضعها ولا أراك إلا خااااااااااااااااسر بكل المقاييس وكل وقتك هو مكسب جديد لصحيفة ذنوبك ومكاسب لصفحات جهل راااائعة فهنيئاً لك بها.

محمد جعفر

مهندس عانس سابق وغير متعاطف إطلاقاً مع أصدقائي العوانس.

الشباب العانس

والاقي حد من اصحابي يقولي ما تعرفش عروسة؟ ياعم كل دي بنات موجودة وأنت مش شايفها؟ ده أكيد مش شايفها لأنك أعمى.

لا ضرورة للفرح ولا داعي لشبكة فدبلة و خاتم تكفي. هي تبحث عن الكفاح في سن يسمح بالكفاح.

بالله عليكم من العانس؟

وافضل دور على بنات ع الماسنجر و الفيس بوك ، دور على أفلام على النت تشوف ايه اللقطات ال uncut في الفيلم.

محمد جعفر

مهندس عانس سابق وغير متعاطف إطلاقاً مع أصدقائي العوانس.

امشي في جنازة و لا تمشي في جوازة

g3foor — Mon, 10 Aug 2009 17:17:11 +0000

امشي في جنازة ولا تمشي في جوازة

المثل ده صحيح 100% وحاتكلم على موقفين غلطت فيهم وشاركت في توفيق رأسين في الحلال ، الأول كان من صديقي م.محمد يحيى لما سألني على واحدة زميلتي في الكلية وأخلاقها وشكرتله جداً وكأني دبور بيزن على خراب عشه كل شوية أقوله روح كلمها وهو محرج لحد ما في الآخر قلتله حافتحلك أنا الباب وكانت واقفة مع واحدة صاحبتها ، رحت وقلت لصاحبتها بعد إذنك وكنت أعرف ال 2 كويس جداً لأني كنت باخد دروس معاهم وباشرحلهم خرسانة من زمااااااااااان ، كان فيه عشم في الكلام المهم البنت سابتنا ، رحت مكلم الرأس الثانية بكل صراحة وقلتلها علشان مش عاوزك تبقي قاعدة ومش فاهمه ، قالتلي أولاً شكراً ثانياً المفروض هو اللي ييجي يتكلم.

ناديته يا محمد تعالى ، محمد جه عرفتهم على بعض وبعدين قلتله افتح الموضوع ما فتحش غير بقه ونسيه مفتوح!

في ايه يا ابني اتكلم ولا قال أي حاجة

وبعدما سكت دهراً… أخيراً نطق لكن كفراً

وقال محمد مش دي البنت اللي قصدي عليها ، فالبنت قالت طيب عن إذنكم وأنا بقيت عاوز اضربه بال…..

تاني موقف

مع 2 عزاز عليا جداً مهندس ومهندسة من أفضل من قابلت في حياتي بس ال 2 متخرجين ومش لاقي مناسبة تجمعهم فقررت إني أنظم رحلة واعزم ال 2 فيها وقد كان.

وعلى حظي كنت مشغول جدا ومش قادر اروح بس رحت وبعد رحلة شاقة في الأتوبيس وعملت المستحيل علشان افتحلهم مليون موضوع مشترك وسبتهم يتكلموا كتير وفي الأتوبيس وإحنا راجعين.

لكن في النهاية!

باقوله عملت ايه يا …. قالي بصراحة ما كنتش مركز أصل كان عندي إسهال!!!!!!!!!

طبعاً قلتله ₠₡₣₤₦₥₩₫€₭

اتعلمت بعدها إن امشي في جنازة ولا تمشي في جوازة

محمد

هن سلوى و أمة الله

g3foor — Mon, 10 Aug 2009 16:52:44 +0000

هن

ما ينفعش تقول هن وما تقولش 2

سلوى سالم وأمة الله وال 2 بالمناسبة ما يعرفوش بعض أصلاً لو حبيت تعرف يعني ايه بنت مصرية متدينة مثقفة يبقى يا تقول سلوى، يا أمة الله.

لما تحب تتناقش مع حد يطلع 1000 تناقض في كلامك مع إن كلامك بسيط يبقى عليك وعلى سلوى.

لو حبيت تقرأ كتاب بالإنجليزية وتناقش حد فيه عليك وعلى سلوى غالباً حاتكون قرأته.

عاوز تناقش فيلم أو مسلسل كوري أنت شفته غصب عنك J لازم تروح تشوف سلوى فين وتتناقش معاها.

عاوز تنتحر؟

روح لسلوى وقولها كلام بسيط جداً موقف أو رأي حتلاقيها قالتلك مليون ألف تعليق على كلامك وإن كله مش منطقي وهي بتكلمك بمنتهى البرائة ولا تشكك في كلامك على الإطلاق.

عاوزك تبقى بقى في قمة ثورتك ، ثائر جداااااااااااااااااااااااااااااااا على إستعداد ترتكب جناية وفجأة توصل للصفر؟

روح حالاً لأمة الله ، عندها قدرة غير طبيعية على إنها تمتص أي غضب من اللي قدامها وتخليه عادي وتناقشه في موضوع تاني خالص وتخليه يندمج فيه.

عاوز تشوف بنت مصرية للنخاع وتعرف يعني ايه سياسة؟ وبتشارك فيها بثقة؟ لا مجال تشوفها في مصر غير في أمة الله.

عمرك شفت مهندسة ومدرسة وطبيبة نفسية وحتلاقيها أختك و والدتك وصديق بعقل أكثر من رائع؟ بجد لازم تشوف أمة الله وتتناقش معاها في أي موضوع ديني سياسي ثقافي أدبي فني فلسفي علمي.

أتناقش وما تزعلش لما تحس بجهلك ، لأن ده الطبيعي وأنت بتتكلم معاها.

بجد أنتم ال 2 من النماذج اللي أتمنى بنتي تطلع زيهم.

محمد

القسمة والنصيب

g3foor — Sat, 08 Aug 2009 19:02:14 +0000

القسمة والنصيب

أصل الجواز ده قسمة ونصيب كانت والدتي الله يرحمها بتقول دايماً كده ، آخر حاجة قالتهالي قبل ما تتوفى ربنا يكرمك في شغلك وتنجح دايماً يارب وتنول اللي في بالك وربنا يرزقك من حلال ويفتحلك أبوابه ويكفيك شر أذية الظالمين – قصدها الحكومة – ويرزقك بنت الحلال اللي تعوضك خير عن اللي فات وتريح قلبي عليك في اللي جي.

وما فهمتش حاجة من كلامها غير أنها حاسة إن نهايتها قربت واتوفت بعدها ب 36 ساعة وكانت الجمل اللي فاتت آخر ما نطقت وبعدها دخلت في غيبوبة,

الله يرحمك يا أمي ، حاربت بعد وفاتك في جوازة ومكانش فيها نصيب وكنت بحارب فيها لأني كنت مقتنع إنها لو ما مشيتش فمش حاتجوز أبداً!!!!!!!!!!!!.

لأني حاسيب البنت اللي لقيت فيها كل حاجة بادور عليها بمنطق الورقة والقلم. وبسبب كمين ونسيت المحفظة في عربية بابا ورحتله الجامعة بالصدفة لقيت قلبي وقف ومش بيتحرك ومش عارف ايه الملاك اللي بيتحرك في مكتبه ده وكل ما بابا يتكلم بابقى عاوز ازق الكرسي بتاعه بره علشان يسكت ويسيب الملاك ده يتكلم.

وبكل غشم الصعايدة وبأغبى طريقة عدت في تاريخ البشرية سألتها على كل حاجة بصراحة في اسئلة مباشرة لا تحتمل تأويل

ولقيت كل الإجابات مالهاش أي علاقة باللي أنا مشترطة في البنت اللي عاوز أرتبط بيها ، لكن سبحان الله مؤلف القلوب بتلاقي قلبك مش بإيدك ما تعرفش تدوس على زرار توقفه ما تعرفش تمسح سطر من كود فما يشتغلش ما ينفعش تخلي مخك يقيسها بمنطق خدت كام درجة من إجمالي درجاتك!

عرفت يعني ايه القسمة والنصيب ، عرفت إن ربنا لما يكتبلك حاجة ويقسمهالك من نصيبك حاتجيلك ، حاتجيلك ولو كنت أنت غبي وعنيد ، حاتجيلك غصب عنك.

وعرفت من زوجتي بعد كده وهي بتقولي كنت رايحة أقدم بحث علشان آخد 10 درجات ما خدتهمش لكن خدت قلب طفل – على إعتبار أني طيب – وزوج وأخ.

لما صديق ليا أو صديقة ليها يسألوا عرفتوا بعض ازاي؟ يستغربوا قوي يقولوا في الآخر زي والدتي الله يرحمها

أصل الجواز ده قسمة ونصيب.

محمد

إمبارح والنهاردة

g3foor — Sat, 08 Aug 2009 18:43:56 +0000

إمبارح والنهاردة

إمبارح والدتي الله يرحمها عملتلي ساندوتشات وحطتلي كيس شيبسي ب 25 قرش وادتني جنيه كامل مكنتش مصدق نفسي إنه في إيدي! ده بيه ممكن اشتري نص الدنيا و وصلتني بنفسها لحد باب المدرسة وخدني منها ميس هدى ومكنتش عاوز امشي معاها كنت عاوز أدخل فصلي 1\1 لوحدي لأني مش صغير وخلاص وصلت أولى إبتدائي و بعد ما دخلت بصيت على الفصل وقررت أني أقعد جنب واحد شكله طيب عرفت بعد كده إن إسمه م.محمد إبراهيم.

بعد 5 دقائق بدأ مهندس المستقبل محمد إبراهيم يعيط وقلتله ما يعيطش لأنه كبير خلاص و وصل ل أولى إبتدائي.

ميس هدى سلمت علينا واحد واحد وباسته وجابت كشكول للفصل كتبت عليه السنة 1989 وكتبت في كل صفحة إسم طالب أو طالبة وبدأت تسأله لما تكبر عاوز تبقى ايه؟

كلهم قالوا طيار وظابط وأنا قلت مهندس ، لكن ميس هدى سألت مش عاوز تبقى ظابط وعلى كتفك نجوم ومعاك مسدس؟

قلتلها لأ عاوز أبقى مهندس شاطر ، سألت صديقي الحبيب محمد إبراهيم وأنت يا محمد قالها حابقى مهندس.

قالتله ليه؟

قالها علشان ابقى مع صاحبي.

غمضت عيني وفتحتها لقتني فجأة بقيت مهندس وكمان سنيور ومتزوج.

حسيت أن الزمن خداع ، خد حاجات كتيرة وما سابليش أي حاجة احتفظ بيها.

افتكرت وكنت شاطر جداً في الخرسانة أول مبنى صممته وكنت لسه طالب باتدرب في مكتب إستشاري وعرفت وأنا شغال أن الفيلا دي حاتتنفذ بعد 3 أسابيع.

كانت الأول رجلي بتترعش تحت المكتب رعشة بسيطة لحد ما وصلت لركبي بتخبط في بعضها ومش قادر أثبتها غير بأني أقوم أقف.

افتكرت ده وأنا شغال النهاردة في تعديلات حاتتعمل في منصة بترول حانفك جزء منها ازاي ونركب مصعد وحاننقل طلمبات والمنصة شغالة بكامل كفائتهاومسؤوليتي فيها خط البترول لخزاناته ما يتحرقش وما أسهل أنه يتحرق والمنصة بالكامل بتتفك وبتتلحم من تاني وقاعد معايا 6 مهندسين بجنسيات مختلفة بتخصصات مختلفة مسؤوليتنا كلنا سلامة المنصة.

افتكرت وأنا قاعد في إجتماع مع مهندسين من الجيش الأمريكي في مشروع محطة تنقية حانصممها تحت سطح البحر ب كيلو كامل. وأنا قاعد معاهم باشرح الفكرة وليه الفكرة دي بالذات وايه مشاكلها وحانعمل فيها ايه وعارف أن مدير المهندسين معتمد عليا في الإجتماع ده إني لازم أقنعهم علشان التمويل وكان سايبني قبلها انسق بين 9 تخصصات مختلفة.

مش عارف حسيت بأيه

بس كنت عاوز أقول شكراً لناس كتيرة قوي

عاوز أقول شكراً لميس هدى و استاذ فاروق الله يرحمه ومدرسة الجيزة الإعدادية و لفصل 2\24 وعاوز أقول شكراً لنهى مراتي وعاوز أشوف والدتي الله يرحمها أقولها شكراً وابوس ايدها واقولها بانجح.

عاوز أقول ل م.عمرو عرجون شكراً وأقول م.حازم بدر شكراً ، أشوف د.منير مجاهد أقوله شكراً.

أقول ل دكتور لواء مهندس خلف شكراً

أنا مديون لناس كتيرة قوي ومش عارف أسدد ديوني ازاي. وإن سددتلهم ديوني أسدد لربنا ديني وفضله عليا ازاي؟

الله يرحمك يا أمي كان نفسي تشوفيني

محمد